આપણી ભારતીય સંસ્કૃતિની સંયુક્ત કુટુંબ વ્યવસ્થા કે જ્યાં બાળકના સર્વાંગી વિકાસની તમામ શક્યતાઓ સહજ રીતે ઉપલબ્ધ થતી હતી તે વ્યવસ્થાઓ હવે ખૂબ ઝડપથી જુદા જુદા કારણોથી તૂટી રહી છે. બદલાતી કુટુંબ વ્યવસ્થા અને આધુનિક સમયના પડકારોમાં મા-બાપ બંનેને આર્થિક ઉપાર્જનના હેતુસર પોતાના મહત્તમ શક્તિ અને સમય આપવા પડે છે. જિંદગીની આ દોડમા મા-બાપ તરીકેની ફરજ ઘણી વખત જાણ્યે – અજાણ્યે ચૂકી જવાય છે, અવગણના પણ થઇ જાય છે. પરિણામ સ્વરૂપે પોતાનાં સંતાનોની કેળવણી સંદર્ભે અમુક અંશે નિષ્ફળતા પ્રાપ્ત થતી હોય છે.

બાળકનો સર્વાંગી વિકાસ એ તંદુરસ્ત સમાજના નિર્માણ માટેની પ્રાથમિક જરૂરીયાત છે. મારી સમજણ મુજબ કોઈ પણ વ્યક્તિના પાંચ વખત જન્મ થાય છે. પ્રથમ જૈવિક જન્મ ( બાયોલોજીકલ બર્થ ), બીજો શારીરિક જન્મ ( ફીઝીકલ બર્થ ). ત્રીજો સંવેદનાત્મક જન્મ ( ઈમોશનલ બર્થ ), ચોથો સામાજિક જન્મ ( સોશિયલ બર્થ ) અને પાંચમો વ્યવસાયિક જન્મ ( પ્રોફેશનલ બર્થ ).

બાળકના સંવેદનશીલ અને સામાજિક ( ઈમોશનલ અને સોશિયલ ) પાસાંના વિકાસ માટે પરિપક્વ (મેચ્યોર) પેરેન્ટિંગ થવું ખૂબ જ આવશ્યક અને અનિવાર્ય છે. જવાબદારીપૂર્વકના ઉછેર પછી જ વ્યક્તિનો સફળતાપૂર્વક વ્યાવસાયિક જન્મ થાય છે.

માઈ-બાપ – ધી સ્કૂલ ઓફ પેરેન્ટિંગ આ બાબતમાં ખૂબ જ અસરકારક નીવડશે અને તેનો લાભ લેનાર તમામ માતા-પિતા જવાબદાર સંતાન ઉછેર દ્વારા પરિપક્વ સમાજનું નિર્માણ કરવામાં નિમિત્ત બનશે તેવી મને શ્રદ્ધા છે.